UMvuthwamini
Nina bakaNdaba omuhle kakhulu uNdaba ngiyemeba ngimuke naye , ngimbuke kuze kwehle nezinyembezi kube sengathi ngibuka isihlahla soMdlebe ! Enhla nasezansi ngiyanibingelela nina abeNkomo eyakhala eMthonjaneni izizwe zonke zayizwa ukulila !
UMvuthwamini:
Nina abeSilo lo muthi eniwubona esithombeni esingezansi kuthiwa uMvuthwamini ngesiZulu. NgesiXhosa kuthiwa uMvuthwamini, noma uMnyushulube. NgesiBhunu kuthiwa yiGewone bokdrok. I”Botanical name” yawo kuthiwa yi Canthium inerme. Ka se Pedi bare ke Mmutswa o sepela. NgesiVenda ubizwa ngoMuvhibvela shadani. Lo muthi unezithelo ezidlwayo , ezimnandi , bayazazi abafana abelusayo. Ziluhlaza ngombala uma zingakavuthwa, uma sezivuthiwe ziyawuguqula umbala zibe nsudu njengamaViyo. Lezi zithelo ungazedlula ekuseni ziseluhlaza , zingakavuthwa, uthi uma ubuya ntambama uzifice sezivuthiwe sezinsundu. Zivuthwa emini, zimnandi zehla esiphundu.
UMvuthwamani kwezaMakhathakhatha:
Izingxabu zoMvuthwamini zinguNgqaphambili emithini engena oKhambeni lokwelapha iDlozi labeZizwe. Kuyileso sizathu uMvuthwamini ubuye ubizwe ngeDlozi labeZizwe. Izingxabu zoMvuthwamini ziyangena futhi naseMagobongweni ,zikhuphula iSithunywa , sisheshe siphakame . Izingxabu zoMvuthwamini zinhle kakhulu nakwezezinhlanhla , ziletha enkulu inhlanhla uma umuntu ephalaze ngazo, kuvuleka nezindlela ,kwazise ziwumuthi osondelene kakhulu neDlozi , zenza umuntu athandwe yiDlozi. Zinhle kakhulu uma uziqhathe neNingizimu nayo futhi ewumuthi omkhulu weDlozi , owenza umuntu athandwe yiDlozi. Ungayithaka-ke neminye imithi emhlophe yeDlozi efana noVumakubangoma omhlophe , uMadlozana, iNhlanhlemhlophe kanye neminye . Izingxabu zoMvuthwamini zibuye zingene naseZibungeni zeBhizinisi, zidonsa amaningi amaKhastama. Izingxabu zoMvuthwamini zibuye zibe wumuthi omuhle wamanxeba, awesilwane kanye nawabantu . Ziye zonyiswe bese ziqothwa zibe impuphu eyofakwa emanxebeni amasha namadala, kanye nasezilondeni ezibhibhayo , izilonda ezaziqhamukela . UMvuthwamini uwumuthi omuhle kakhulu wenhlanhla , kuphela nje abantu abawunakile. Ake ngime lapho nina bakaBhejane phuma eSqiwini kade bekuvalele uQasa lukaWasa inkomo esangwa yiViyo!
