USandile Mthethwa,umdlali webhola.
Inkosi uSokwetshatha ka Myandeya Mthethwa
Nina abeZulu eladuma eNhlangwini kuBathembu aBathembu bakhweza baya ngoJama ka Mnisi,uSombangeya akasoze atshelwa ndaba uyatshelwa izindaba ugijimela ehawini!Esithombeni nina beSilo uSandile Mthethwa odlalela uSuthu.Nina beSilo ake sixoxe kancane ngenkosi uSokwetshatha Mthethwa eyayibusa aBathethwa kwesakwaMthetwha ngesikhathi sokubusa kweSilo uCetshwayo.Sizowukha nje phezulu umlando wayo kuhle komuntu ekha amasi.Inkosi uSokwetshatha ka Myandeya yayizalwa eNdlunkulu yakwaZulu,izalwa uMntwana uNomqotho kaSenzangakhona.ABantwana oNomqotho noSigujana babezalwa uNdlunkulu uBhibhi ka Sompisi Ntuli,okusho ukuthi babengabaShana bakaNdunankulu uNdlela ka Sompisi.Kuzokhumbuleka nina beSilo ukuthi kwathi ngemuva kokukhothama kwenkosi uDingiswayo uMondisa ka Jobe Mthethwa wazibeka ngenkani esihlalweni sobukhosi baBathethwa.Okwalandela lapho kwaba wukuthi uMondisa abulawe yiMpi yeSilo uShaka.Ngikhuluma ngoMondisa wakwaMthethwa bakithi hhayi owakwaSithole.Ngemuva kokubulawa kukaMondisa iSilo uShaka sabeka uMmbiya ka Shangana njengenkosi yaBathetwha ize wayezalwa eKhohlo.Inkosi uMmbiya yazala inkosi uMyandeya uyise wenkosi uSokwetshatha.Inkosi uSokwetshatha yabuthelwa ebuthweni loMxhapho okwakukhona kulo noMntwana uZibhebhu,babuthwa iSilo uMpande.Kwathi ngesikhathi sokubusa kweSilo uCetshwayo inkosi uSokwetshatha yaxabana nokaNina wayo inkosi uSomkhele ka Mayanda Mkhwanazi.Kuzokhumbuleka ukuthi phela nayo inkosi uSomkhele yayizalwa eNdlunkulu kaZulu izalwa uMntwana uNtikili indodakazi yenkosi uSenzangakhona eyagana inkosi uMayanda Mkhwanazi.Ingxabano phakathi kwenkosi uSokwetshatha nenkosi uSomkhele yenzeka ngenkathi uMntwana uZibhebhu ewamise kabi amakhosi ayewuSuthu kanye nezikhulu zeSilo uCetshwayo.UMntwana uZibhebhu wayewumngane omkhulu wenkosi uSokwetshatha kwazise babebuthwe ndawonye ebuthweni loMxhapho.Inkosi uSokwetshatha yagcina ithathe isinqumo sokuthi igqishe noMntwana uZibhebhu kanye nenkosi uBizo ka Mzimba Cebekhulu ekudaleni izinxushunxushu kwaZulu.Inkosi uBizo yayiwuThulwana“ iMboza nkomo ngothuli”.Kanti uyise yena wayewuMbelebele ,”iWombe leNdlovu”.Bobathathu oMntwana uZibhebhu,inkosi uSokwetshatha kanye nenkosi uBizo bawamisa kabi impela amakhosi asoGwini ayewuSuthu- enyakatho yoMhlathuze,amakhosi esingabala kuwo yona inkosi uSomkhele Mkhwanazi,inkosi uSomopho ka Sikhala Mthembu,inceku yeSilo uCetshwayo uBhejane ka Nomageja Khoza kanye nabanye.Ake sime lapho okwanamuhla nina beSilo.Umlando esiwushicelela lapha nina beSilo usezincwadini ezalotshwa ngabaBhali bangaphambilini.Kanti futhi osekwenzeka sekwenzeka nina beSilo ngeke sikushintshe.
Khumu!
