INtibane
Nina abakaKlebe engimbone ukwehla kwezikaMangcengeza kwathi kwezikaPhungashe wanyamalala! UGawu bawuliluma bazawuliphimisa bakhumbule amaGawu abebesi! INkomo eyakhala eMthonjaneni izizwe zonke zayizwa ukulila! #ISilo uShaka leso , iSilo sakithi KwaDukuza ! Enhla nasezansi ngiyayibingelela yonke iNgabade , ngethemba basaphila abeZulu eliphezulu. Cha, thina sisaphila eMantungweni. Nina beSilo le silwane enisibonayo kuthiwa iNtibane ngesiZulu. Inyama yeNtibane imnandi ngendlela eyisimanga , abantu baboshelwa yona eZiqiwini. INtibane akuyona iNgulube yentaba\iNgulube yehlathi..NgoLimi loSosayensi iNtibane ibizwa nge Phacochoerus africanus , kanti ngesiNgisi ibizwa ngeWarthog. Iningi lethu lapha kweleNdlovukazi uMthiniya liyehluleka ukwehlukanisa iNtibane neNgulube yentaba. Kanti kuhlukaniseka kalula kabi . Umsila weNtibane mude , uneshobana elincane ekugcineni , iyawumisa uma igijima , iwumise uqonde ubheke phezulu. Kanti umsila weNgulube yentaba wona mfushane ungangoweNgulube efuywayo ekhaya. Umehluko wesibili ubumnandi benyama yeNtibane kuneyeNgulube yentaba. Umehluko wesithathu ukuthi iNtibane iyahlinzwa , kanti iNgulube yentaba yona iyaphalwa njengeNgulube yokufuywa. INgulube yentaba ifuze yona impela eyokufuywa . Umehluko wesine ulaka, inolaka kakhulu iNgulube yentaba.Ngeke uyenze lutho ngezinja ezibuthuntu ngoba ziyosala enkundleni zonke, nawe futhi ungagcina usale othulini. Usungasindiswa ukukhwela esihlahleni noma ukuvika ngaso kwazise lezi zilwame iNgulube yentaba neNtibane azijiki kalula, zijika ngawo wonke umzimba uma zizojika. Izintamo zazo zihlangene nekhanda , kanti nalo likhulu ,okubangela ukuba kube lukhuni kakhulu ukijika kuzona. INtibane yona ayilwi kangako, isheshe icele eMpunzini. Umehluko wesihlanu amazinyo, amazinyo eNtibane made futhi aphumele kakhulu ngaphandle, aqinile awephuki kalula. Umehluko wesithupha ukuthi ikhanda leNtibane liqinile kuneleNgulube yentaba.Liqinile ikhanda leNtibane aliphihlizeki ngeWisa, kuyileso sizathu aBelaphi beNdabuko bebethela ngalo umuzi.
Yenzani -ke iNtibane?
Nina beSilo iNtibane yinhle kakhulu kwezokubethela ikhaya. Kuye kusebenze ikhanda kanye namafutha . Kuye kuthakwe eNdukwini yokubethela kanye nokucupha ikhaya. Liqina kakhulu ikhaya elibethelwe ngeNtibane, alideleleki futhi, liyaqina libe nesithunzi. Amazinyo eNtibane angena eMabuthweni okulwa. Ayangena naseMabhandeni.Amazinyo eNtibane ayangena kwezokuphindisa. Isikhumba sesiSiphundu seNtibane sihle ekuvikeni amaPhoyisa,Ngisho noma ungathatha isikhunjana esincane seSiphundu seNtibane usifake ePhaketheni noma eMotweni ngeke uvinjwe ngamaPhoyisa ,udlula kuzo zonke izinhlobo zeZivimbamgwaqo ngisho noma kunamaSosha. Isikhumba seNtibane siyashiswa kanye neMpepho eMsamo ukuze aBantu abadala basheshe bakuzwe. Umswane weNtibane noma amasimba kuyashiswa ekhaya kushiselwe ukuxosha imimoya emibi. Kuhle futhi nasekwelaphani umuntu othakathwe noma ngayiphi inhlobo yobuthakathi.Kuyashunqiswa kuphinde kuthakwe eZimbizeni zabantu ababangwa nezibi. Kuthiwa uma uphuphe iNtibane kusuke kusho ukuthi kukhona owakwenu owabe ewuNdlelazinuk’umswani weNyanga osefuna ukungena kuwe . Kanti futhi uma ungumuntu ogembulayo- uma uyiphuphile kusuke kusho uNombolo 8.
Khumu!
Niphile nina abaKhawuleza Nkume yoHlanga iyasha imizi eMaphethelweni! Vakashela uYou Tube wethu osihloko sithi “Kholo Khumalo TV” uthole olunye ulwazi….
