UFoshela /uQhwashu/Ikhambi lakwaNgcobo/Felicia erigeroides
Nina baka Somnandi ka Ndaba woza ngange umlomo umlomo uyangiwa kithi KwaZulu,uTshwala buka Gologo babungaphuzwa muntu kithi kwaMalandela babuphuzwa yimihlambi yezinyamazane!
Enhla nasezansi ngiyayibingelela iNgabade . Lo muthi engiwubona esithombeni ubizwa ngokuthi uFoshela ngesiZulu, noma yiKhambi lakwaNgcobo. Ubuye ubizwe ngokuthi uQhwashu, ngenxa yokuthi unamakha anuka kamnandi . NgesiLungu soSosayensi kuthiwa iFelicia erigeroides . Lona wumuthi owande lena eThekwini , KwaDukuza, nakoNdwendwe . Wumuthi wobuhle lona . Wumuthi wogazi nenhlanhla lona . Wumuthi okhonzwe kakhulu ngamaSoka, izinsizwa ezeshelayo. AmaSoka awuthaka eNdukwini yawo eMhlophe . okuyiNduku yokwakha ugazi nokwakha iNhlanhla. Lo muthi ubuye ungene emithini ethakwa uma kwakhiwa iSikhahlamezi. ISikhahlamezi yingxube yemithi ethakwa yenziwe iNduku egcotshwa ezandleni nasebusweni. Igcotshwa izinsizwa . Uma insizwa egcobe iSikhahlamezi ike yaxhawula intombi , noma yayithinta, leyo Ntombi ivele ilangazelele ukuya ocansini naleyo nsizwa khona lapho , kangangokuthi ize iyilandele nokuyilandela . Kuleyo mithi kusuke kuthakwe wona uFoshela , uDumbasimbu , uVelangemoyeni , uMusa , uNginakile kanye neminye imithi.
AmaSoka awukhonze kakhulu uFoshela , aphalaza ngawo , ayagquma abuye ageze nangawo. Wumuthi omuhle kakhulu kakhulu lona ekwakheni ukuthandeka .AmaSoka awuqhatha nale mithi elandelayo
Imithi eqhathwa noFoshela
-UBuvimbo
-INhlanhlemhlophe
-UMusa
-UVumakubangoma omhlophe
-UQhume\uMfazothethayo
-UMtholo/UMafunazayithole
-UDumbasibumbu
-UNgibonisele
-UNginakile
-UVelabahleke kanye neminye imithi emihle yeNhlanhla
Kule mithi ukhetha embalwa uyoyithaka eNdukwini yakho , awuyibhubhudleli yonke
Ake ngime lapho nina beNhlehlayovane ka Ndaba ehlehle futhi ngoBulawayo yazithatha zonke izinhlangu zoMbelebele. Niphile nje nina beMbube!
*Ngena kuYou Tube wethu osihloko sithi “Kholo Khumalo TV” ucoshe olunye futhi ulwazi ngamakhambi
UFoshela
