Isithombe esendawo yaseLisuthu.

Umlando ngesibongo sakwaSeteka

Nina beSilo ezweni laseLesotho kukhona abantu besibongo sakwaSeteka.Labo bantu kahle-hle bangabakwaMaseko.USeteka lona okwaqanjwa ngaye isibongo igama lakhe langempela nguSidinga indodana yenkosi uMgazi ka Khabangobe Maseko.Inkosi uMgazi yayiganwe uMntanenkosi uLambombotsi Dlamini waseSwazini,udadewabo weNgwenyama uMswati wesibili.Kwathi ngonyaka ka1837 kwaqubuka ingxabano phakathi kweNgwenyama yemaSwati nenkosi uMgazi yamaNgcamane,leyo ngxabano yaholela ekulimaleni kwenkosi uMgazi ilinyazwa amabutho eNgwenyama yemaSwati.Ngenxa yezinxushunxushu ezabakhona phakathi kwalezi zizwe ezimbili uSidinga wakubona kukuhle ukuthi athi khumu emndenini wakhe anyomuke abheke kwelabeSuthu.Esefikile-ke kwelabeSuthu wagcina esebizwa ngelikaSeteka ngenxa yokubhimba kwabeSuthu.Nozalo lwakhe nalo lwagcina selubizwa ngokuthi lungabakwaSeteka,kuze kube namuhla lokhu lwaziwa ngaso leso sibongo.Luyatholakala eLesotho nakoQwaqwa,Phuthaditjaba nakwezinye izindawo.Sikhulu isibongo sakwaMaseko nina beSilo sinobukhosi eSwazini,eMalawi kanye naseMozambikwe.Inkosi uMgazi yakhothama ngo1840 ikhathazwa yilona lelo nxeba lomkhonto lango1837.Yashiya inkosana yayo uKhophoza kanye nabanye.

Khumu!