Isikole iPhalane Primary School
Isikole iPhalane Primary School
Nina abeMpunzi ka Ndaba abayibambe ngandlebende phezu kukaLangakazi yadlamuluka yadla amadoda!UGuqabadele iNhlambamasoka iSinakanaka sezincwadi ebezibhalwa uMalimade kwabamhlophe abeLungu!UJininindi lowo,iSilo sakithi oNdini.Esithombeni nina beSilo izingane zeSkole iPhalane Primary School kwaDlangezwa eMpangeni.Ngithanda ukudlulisa ukuxolisa okukhulu bakithi ezinganeni zami ngokuziveza ezinkundleni ngaphandle kwemvume yazo,ayidle izishiyele zingane zami.Lesi sikole iPhalane Primary School saqanjwa ngoPhalane ka Mdinwa Mkhwanazi iQhawe leSilo uCetshwayo.Ngizwa kuthiwa naseNkandla sikhona futhi esinye isikole esinegama elifanayo.UPhalane wayeyindodana kaMdinwa,wayebuthwe iSilo sakwaNodwengu ebuthweni loThulwana(AMamboza amboza izinkomo ngezintuli).Kulelo butho kwakukhona noMntwana uCetshwayo,inkosi uSomkhele kanye namanye amaqhawe.UPhalane nebutho laMamboza bahlabana kakhulu empini yaseLubuya kanye nasempini kaSikwata okuyizimpi ezaziphakwe iSilo uMpande.ELubuya ngakwaHlathikhulu kwakudumelene uZulu namaSwati ngaphansi kweNgwenyama uMswati wesibili,kanti uSikwata owayeyinkosi yabaPedi eyindodana kaKgosi Thulare.UKgosi Sikwata wazala uKgosi Sekhukhune okwaqanjwa ngaye indawo yakwaSekhukhune.UKgosi Sekhukhune wayengumenwabo kaMampuru okwaqanjwa ngaye iJele lasePitoli.UPhalane kaMdinwa wabuye wabamba elikhulu iqhaza empini yaseNyezane eGingindlovu lapho ayelekelela khona inkosi uSomopho ka Zikhala Mthembu ukudidiyela impi kaZulu ngenkathi ibambene phezulu namaNgisi.IMpi yaseNyezane yalwa ngosuku olulodwa nempi yaseSandlwana mhlaka 22 Masingana 1879.Leli qhawe laBakhwanazi lashona ngo1900 sekubusa iSilo sasoSuthu,lashiya amadoda alo esingabala kuwo uThumbela,uQantayi,uNgogwana kanye nabanye.
