IPhophoma
Incazelo ngePhophoma (Sacamone alpini)
Nina bakaSomkhanda wakithi eMkhontweni okhande abezindlu nabezindlwana abezindlu bayikhexa imilomo.UMagalela agase njengeNkosi yaMantshali ngoba egasele uZibhebhu kwaNdunu.ISilo uDinuzulu leso.Ngethemba basaphila abeSilo.Le nduku eniyibonayo ibizwa ngokuthi yiPhophoma igama layo,kunomehluko phakathi kwePhophoma nePhuphuma,
IPhophoma
IPhophoma wumuthi okhula uthandele isihlahla esikhulu njengoMzungulu.IPhophoma liwuBulawu obuhle beDlozi ,ligena eGobongweni elimhlophe, likhonzwe kakhulu yiZangoma noThwasa.IPhophoma libizwa ngokuthi iMonkey rope ngesiNgisi,ngesizathu sokuthi iZinkawu zibambelela kulona uma zidlala,zijahubhana phezu kwesihlahla eskhulu iPhophoma elisuke lizithandele.Libuye libizwe ngokuthi Sacamone alpini ngoLimi loSosayensi.Liyaphalaza,liletha enkulu inhlanhla manxa umuntu ephalaze ngalo,iyaphophoma inhlanhla,ichichime kumuntu osuke ephalaze ngalo.Kuye kuphalazwe ngempande yePhophoma.Lingeminye yemithi engingafakaza ngayo,ngithi imandla kakhulu ekuvuleni izindlela ezivalekile.Lihle iPhophoma kwezokwandisa,kungaba umnotho,imfuyo kanye nokunye.Lihle kakhulu nasemithini yezithunzi,lihle nasemithini yeSidina.Nakhona kuyaphalazwa ngalo.Lithi lapho liphehlwa ngothi lwePhahla likhiphe elikhulu igwebu,elihle futhi,elimhlophe qwaba.Lihle kakhulu uma uliqhathe neNingizimu, okungeminye yemithi emhlophe yeDlozi.Ungazithaka-ke nezinye izinduku ezimhlophe zeDlozi.IPhophoma lithandwa kakhulu ngamaSoka,alithaka eNdukwini yawo emhlophe yeNhlanhla,aliqhatha nemithi emhlophe efana noVumakubangoma omhlophe,oVelabahleke,iNhlanhlemhlophe,uMusa kanye neminye.Impande kanye nezinduku zePhophoma zibuye zingene kwezokugquma nezokugeza,ziletha enkulu inhlanhla nokuthandeka kumuntu.Ake ngime lapho nina bakaZiyayinhlonhlonga inkomo ethandwa zibawu.USodidase.Inkonyane encane ka Ndaba edide imibala.
Khumu.
Ngena kuYou Tube wethu osihloko sithi ‘Kholo Khumalo TV’uthole olunye ulwazi ngempande
