UMAPHUTHUMA

Nina aboVemvane luka Phunga noMageba uVemvane lumabala azibhadu ngibe ngiyaluthinta luyahwaqabala lunjengoPhunga waseBulawini , lunjengoVumakubangoma! Inkomo eyabuya yodwa kwaSoshangane ezinye ziyokufa uMdlebe!! UMancwaba wezwe lamaphethelo lona lincwaba ngemikhemezelo! INdiha lebabayo enjengeSibhaha sona simababa kuMahashanga!! #ISilo sakithi eMgungundlovu leso , iSilo uDingane ka Senzangakhona. Enhla nasezansi ngiyayibingelela yonke iNgabade , ngethemba nisaphila nina beSilo. Le Nduku eniyibonayo kuthiwa uMaphuthuma igama layo, idume kakhulu ngegama layo lesiLungu elithi “The Mexican Sunflower”. OSosayensi bayibiza nge Tithonia diversifolia. Le Nduku ingenye yezihlahla ezingezona ezalapha kweleNgabade , kuthiwa imvelaphi yayo iseMexico . Kwezinye izindawo zaseKZN le Nduku ibizwa ngoNyawo lweNkukhu.

Yenzani le Nduku ?

Nina beSilo impande yale Nduku yinhle kakhulu kuMabutho athunywa ukuyolanda  . Njengegama layo nina beSilo, iyawasheshisa amaButho . Impande yale Nduku ibuye isetshenziswe njengePhakama , yinhle kakhulu ekukhuphuleni amandla eminye imithi njengalo iPhakama. Impande yale Nduku yinhle nakwiZikhafulo zokubuyisa iSithandwa . Amacembe ale Nduku mahle kakhulu kwezithinta izilonda ezingaphakathi kanye nezingaphandle . Aye agxothswe bese ethelwa amanzi amafudumele kwenziwe iSiphungo esiphungwa umuntu onezilonda ezisuka emphinjeni zehle njalo zize ziyofika esiswini. Lesi Siphungo siyazishisa zonke izilonda umuntu aphile qingqo . Lesi Siphungo sihle nakwiMfiva . Siyaselapha futhi neSisu esigulayo. Siyawelapha noMphimbo ogulayo ngisho nama-Ucler imbala. Siyaselapha neSibindi noma aMaphaphu agulayo , aphile qingqo umuntu akwazi nokuphefumula kahle.Amacembe ale Nduku aye agxotshwe nina beSilo bese ethethwa amanzi afumele kugezwe umuntu noma isilwane esilimele ukuze inxeba lisheshe liphole. Abuye onyiswe bese kwenziwa ngawo impuphu eyonanyekwa emanxebeni nasezilondeni. … Amacembe ale Nduku mahle kwiZinhlobonhlobo zeMikhuhlane . Mahle nasekuchatheleni ukwelapha imikhuhlane . Abuye agqume futhi, agqumele yona imikhuhlane . Amacembe ale Nduku ayangena eMbizeni yokuhlanza iSisu. Impande yale Nduku kanye namacembe kuhle kwezokwelapha izifo zocansi kanye nezifo ezishobingisa igazi ezifana noBhelehaziya.. Le Nduku nina beSilo ayiwona uPhakisa umuthi . UPhakisa nawo muhle kakhulu kwezithunywayo

Khumu !!

Niphile nina beSilo. Thola olunye ulwazi kuYou Tube wethu osihloko sithi “Kholo Khumalo TV”