Nina abeNdaba engiyizwe ngiphesheya , bathi nakwaMalandela izwe limangqephungqephu! ISikhukhulane sikaNdaba esikhukhule oMame sabetshatha , saye sayobalahla ezinkwazini zoThukela! Enhla nasezansi ngiyayibingelela iNgabade , ngethemba basaphila bonke abeZulu eliphezulu kungumhla we shumi nesishiya galo lunye kuNdasa , cha thina sisaphila eMantungweni. Lo muthi eniwubona esithombeni esingezansi kuthiwa uNdwendweni ngesiZulu. NgesiXhosa kuthiwa uGotyibe , bathi uma sebewuhasha kwaXhosa bathi ‘Ntombi zibelethene ‘, ngenxa yezigaxa zawo ezixhumana zibe ningi . IBotanical name yalo muthi kuthiwa iCrocosmia aurea . Kanti ngesiNgisi kuthiwa iFalling star . NgesiBhunu kuthiwa iVallendo Sterretjies. Lo muthi uwumuthi obukeka njengoAnyanisi, unezigaxa ezixhumana zibe amawele , zivamise ukuba zimbili, kodwa kwesinye isikhathi ziye zixhumane impela zize zibe nhlanu esihlahleni esisodwa.

Wenzani uNdwendweni?

UNdwendweni uwumuthi omuhle kakhulu ekwelapheni aMafufunyane , phecelezi iZizwe kanye nokukhipha iSilwane. Uyintelezi kahle-hle. Uyathakwa neminye imithi , ugqume , uphalaze uphinde ugezele ukukhipha iSilwane neZizwe. Uyangena futhi nasemithini echela ibala , uxoshe imimoya nezithunzi ezimbi. Uyatshalwa nasekhaya , utshalelwa ukudonsa ubuhle. Muhle kakhulu ekudonseni . Uyangena naseZibungeni zokudonsa eBhizibisini. AmaSoka ayawusebenzisa ekudonseni intombi, ayakhafula , aphephethe abuye aphalaze ngoNdwendweni. Muhle kakhulu naseziMbuzini. Uye utshalwe entubeni yesibaya seziMbuzi , ziweqe nxa zingena , nanxa seziphuma. Abantu bakholelwa ekutheni njengoba lo muthi uNdwendweni unezigaxa ezixhumanayo zize zibe mbili noma zibe ntathu , ngakho-ke nazo iziMbuzi zabo ziyozala amaPhahla. Kanti futhi uba yiNtelezi enhle eziMbuzini ngoba akukho moya omubi oyongena esangweni le sibaya lapho kutshalwe khona uNdwendweni. Lo muthi uNdwendweni muhle kakhulu kwizinhlungu zeFindo , kanye nasezinsweni. Uthiba izinhlungu zensiso kanye nezeFindo kwabesifazane.

Khumu!!!

Ngena kuYou Tube wethu osihloko sithi “Kholo Khumalo TV” uthole olunye ulwazi ngempande:

Niphile nina beNkomo eyakhala eMthonjaneni izizwe zonke zayizwa ukulila!

UNdwendweni\uGotyibe