UMkhuhlu

Incazelo ngoMkhuhlu(uMathunzini, Trichilia emetica)

Nina abakaKlebe engimbone ukwehla kwezikaMangcengeza kwathi kwezikaPhungashe wanyamalala.UGawu bazawuliluma bazawuliphimisa bakhumbul’emaGawu abebesi.INtethe egolwe nganti zamkhonto kithi kwaMalandela.Enhla nasezansi ngiyazibingelela iziNgabade, ngethemba basaphila abeSilo.Cha,thina sisaphila eMantungweni.

UMkhuhlu

Nina beSilo lo muthi eniwubona esithombeni kuthiwa uMkhuhlu igama lawo lesiZulu,ubuye waziwe ngoMathunzini.UMkhuhlu akuwona uMkhokha, futhi akuwona uMsinsi.Lo muthi uyakhuhla njengoba negama lizisho.Ungena ezindaweni eziningi,la ungena khona usuke ungenela ukuzokhuhla.Iningi lethu siwazela kakhulu ekuchatheni,ukuhlanza iqolo.Uyakhuhla lo muthi ukhiphe yonke into engcolile.Kodwa kufuneka uwugade,awufakwa kakhulu ngoba wafakwa kakhulu umuntu engahamba impela.Ubungozi bawo buyefana nobeSende lenja, uMsilawengwe kanye neNtuma.Ekuchatheni kusebenza ixolo loMkhuhlu.UMkhuhlu ubuye ungene nasezimbizeni zokugeqa,nakhona awufakwa kakhulu,kuthiwa nje chatha intwana incane.Uma ukhathazwa yiqolo liyelapheka ngoMkhuhlu.Uma ukhathazwa ukungasebenzi kahle koBhoko lweSisu iyaphela leyo nkinga.Uhlanza negazi,uqede nezinduna ebusweni.UMkhuhlu uyangena nasezinsizini zesichitho . uyangena futhi nasemithini egqumela isichitho.Kusasebenza lona ixolo.UMkhuhlu uyisihlahla esikhula sibe sikhulu impela . Muhle kakhulu nakwezokhuni ikakhulukazi ekwakheni iFenisha.Endulo oKhokho bethu babenza ngawo izingqoko, izinkezo , amathunga okhuni njalo njalo . UMkhuhlu ubizwa ngeMahogany ngesiLungu.Lona owaseNgabade ubizwa ngeNatal Mahoganye.Lena eZhiya bawukhonze kakhulu benza ngawo iFenisha.Kukhona nehlathi lapho bewutshale khona , iMahogany Forest,eBohol,ePhillipines.NgesiBhunu uMkhuhlu ubizwa ngeRooiessehout.NgesiPedi bare ke Mamba.NgesiTsonga bawubiza ngeNkulu.Lena eVenda bathi uMutuhu.NgesiSwati nangesiXhosa usabizwa ngalo eloMkhuhlu.Amakhasi oMkhuhlu ayangena ezimbizeni zezifo zoCansi ikakhulukazi iDilobhu.UMkhuhlu ubuye usebenze njengentelezi egeza konke yonke into engcolile,ekhuhlayo.Uyangena entelezini yokugeza isichitho.Uyangena nasezintelezi zezitha , ezenza izitha zingakuboni,ingakho ubuye waziwe ngoMathunzini.Uyangena nasentelezini yokucupha umthakathi.Uyangena entelezini yokuchela ikhaya uma kuzotheleka izinkumbi zabantu ngenxa yomcimbi.Uyangena entelezini yokugeza amabhadi,muhle uma uqhathwe noMhlambamanzi.Kuningi okwenziwa uMkhuhlu.Ubuye ungene emithini emhlophe yokuphalazela inhlanhla,esingabala oNhlanhlemhlophe,Vumakubangoma omhlophe,Bhubhubhu njalo njalo.Imbewu yoMkhuhlu ethi ayifane neyoMkhokha iye ingaywe bese impuphu yayo inanyekwa emanxebeni nasezilondeni ezibhibhayo ezigoloza ukuphola.Isithelo soMkhuhlu Sisonke siye singanzingwe sibe yinsizi emnyama okuqholwa ngayo imibele yezinkomo lapho idabukile.

Niphile nina abeNkomo eyakhala eMthonjaneni izizwe zonke zayizwa ukulila! IGwija likaMdlaka ligwegwe lijiyeze abasini bengoma!Ngena kuYou Tube wethu osihloko sithi “Kholo Khumalo TV” uthole olunye ulwazi ngempande.